نقطة ومن اول السطر

كتب :-  تيتو المصري 

ياجماعة الوقتي كنت بجيب سجاير وانا واقف مع السوبر ماركت فجيه واحد تاني من حته بجيب سجاير فِ صاحب السوبر ماركت بيسال ليه المدرعات نزلت فرد الرجل قالك عشان يوم 11 فبراير هيبقي في ضرب وكده يعني قولت ليه لا ياعم مش كده القصة هما نازلين عادي بيامنوا علي مستوي الجمهورية الرجل قالك لا عشان الاعتصام المدني قولت ليه طيب هو مش اسمه اعتصام مدني ده أولا راح رد عليا قالي لا هو اسمه اعتصام مدني واسمع اللي بقولك عليه انت شكلك مش فاهم حاجة ، المهم هو مشي وانا بتكلم مع صاحب السوبر ماركت فبقوله مش تخاف مش هيحصل حاجة فِ بيقولي هو ايه العصيان المدني ده هو علي كده العصيان ده ان انا اقفل وكده يعني وتيجي ناس تقولي اقفل والشيخ لو رايح ياذن يقولوا ليه مش تاذن طيب والمخابز بتاعت العيش تقفل بردوة ، فقولت ليه لا كل ده غلط العصيان المدني الوقتي ماشي علي الطلبة والعمال ومش ينفع ان المستشفيات تقفل وكده يعني وبردوة مش ينفع اني اجي اغصبك علي حاجة واقولك اقفل غصب عنك ، دي حرية شخصية وبردوة الشيخ مش ينفع اني اقوله مش تاذن ولا اقول لحد مش تصلي وقولت ليه انه تم استخدام العصيان في ثورة 1919 ايام سعد زغلول والعصيان المدني او الاضراب العام ده طريقة سلمية طريقة ضغط شعبي  ، في خلاصة الموضوع ياشباب ان الاعلام بيروج للعصيان انه دمار ومش كده وبس  لا احنا كمان مش بنزل ونتكلم مع الناس ونفهموا انه مش كده لا احنا بس بناضل علي الفيس بوك وبنوعي بعض من علي الفيس بوك ، الناس فعلا كرهت الثورة وكرهت الثوار بسبب اننا مش فكرنا ازاي نتكلم مع المواطن في الشارع ، بتمني اننا نرجع ونعيد حسابتنا تاني مع الشارع المصري ونتواصل مع المواطن المصريّ .