يا قبضتى من فيلم البرئ

يا قبضتي دقي على الجدار .. لحد ليلنا ما يتولدله نهار

يا قبضتي دقي على الحجر .. لحد ما تصحي جميع البشر

لحد ما تتفسر الأسرار

مش فاهم اللي حاصل .. لكن بقلبي واصل

و اللي مش فاهمه عقلي .. بتشرحه السلاسل

يا قلوب بتنزف دم في العتمة .. ياقلوب بتنزف دم و تغني

سجنوا و بيسجنوا الكلمة .. و الكلمة غصب عنها أو عن

طلعت من القضبان و من الأسوار

كاريكتير عن " التحرش "

الفترة اللي فاتت ناس قعدت تهري وتحكي في موضوع التحرش الجنسي ساعة العيد ع تويتر والفيس بوك وهوب الموضوع اتقفل وفتحوا موضوع جديد للرغي وهكذا وكل واحد عمل فيها محلل استراتيجي والتاني كيمائي ومش خلصنا من كتر الكلام وكتر الالش الرخيييييييييص اللي يقولك البت ايه اللي نزلها كده ، اصلهاً مش لابسه حجاب واللي يقولك ايه خلي الواد يعمل كده وهكذا قعدنا نحكي والسلام واللي يقولك اصل احنا شعب متدين بطبعة ، المشكلة  اساسا انه الواحد مش عنده وعي ان الكلام ده غلط يعني من مفروض من وجهة نظري ان الطفل يتم توعيته من اهله ان الكلام ده وكده يعني ، اما مشكلتنا احنا ان اهالينا بتسيبنا ان الدنيا هي اللي تعلمني ويتقالك بكرة يتعلم وبخصوص للشباب اصل بيقولك الشب مش بيعبوه حاجة ماهو كده او كده رجل ، المهم انا جمعت شوية صور " كاريكاتير " عن موضوع  التحرش الجنسي بطريقة خفيفة ومضحكه شوية يعني :)

حركه كفاية بالاسماعيلية لن نكون طرفا في اعادة أنتاج النظام السابق

أعلن شباب حركه كفاية بالاسماعيلية عدم مشاركتهم في المظاهرات التي دعي اليها بعض الاشخاص تحت مسمي ثورة 24 أغسطس وجاء ذلك في بيان شباب حركه كفاية بالاسماعيلية فقد أعلنوا عدم مشاركتهم وأيضاً أنهم يحترمون التظاهرات والوقفات السلمية ، وأنهم ضد التخريب والعنف والجدير بالذكر أن شباب الحركه أعلنوا أنهم ليسوا طرفاً في المعادلة بين الاشخاص الداعية للمظاهرات وبين الاخوان المسلمين وقد أعلنوا أيضا أنهم لن يكونوا طرفاً في أعادة أنتاج " النظام السابق "  كما جاء في البيان الاتي :- 

 نعلن نحن شباب حركه كفاية " الاسماعيلية " عدم مشاركتنا في جمعة الغد والتي دعي لها بعض الاشخاص تحت مسمي " ثورة 24 اغسطس " ونؤكد علي حرية التظاهر السلًمي ونرفض اي تظاهر يريد تخريب البلد ، فنحن سوف نكون ضده ، ونؤكد أننا لسناً طرفا في المعادلة الان بين " الاخوان " وبين الاشخاص التي دعيت لهذه المظاهرات فنحن نعلم كامل العلم من هؤلاء الاشخاًص فانهم بعض الاشخاص التي تريد أعاًدة أنتاج النظام السابق فلذلك نحن نرفض المشاركة في هذه المظاهراتّ ونؤكد أيضاً علي حرية الراي والتعبير السلمية باي شكل اي كان دام هذا التعبير هو سلًميْ . 

الثورة مستمرة .. المجد للشهداء 

شباب من أجل التغيير .. شباب بيحلم ببكره

من حقنا نعرف

كتب " تيتو المصري " 

دي تدوينات انا كتبها ع تويتر امبارح من كتر ماشوفت تطبيل كتير اوي ، زهقت قولت اكتب اي حاجة والسلام ففكرت اني اجمعهم كلهم واحطهم في مدونة " ع شكل مقال او تدوينة " وكمان امبارح في هاشتاج جديد اسمه #حقنا_نعرف ، فقولت كويس اني اسمي العنوان بتاع التدوينة " من حقنا نعرف " واسيبكم الوقتي مع التدوينة في السطور الجاية :-

لما رئيس الوزراء نزل يشتري لبس العيد والكحك كل الصفحات نشرت الخبر وابتدي التطبيل والتهليل في التعليقات ، ونسيوا ان عصام شرف راح  فطر هو وعياله في مطعم فول وطعمية وسط الناس ، طيب حد نسي يسال رئيس الوزراء فين المعتقلين اللي بتحاكموا عسكرياً ، حد نسي يقوله مين الدفعة اللي تم الافراج عنها واللي بردوة اتطبل للخبر ع صفحات عشان نزلت واتصدموا لما عرفوا ان اللي تم الافراج عنهم هما اللي مسجونين جنائيا وده بيحصل كل سنة بيتم الافراج عن المحكومين جنائيا ناس منهم يعني مثلا اللي حسن سير وسلوك واللي قضي نص المدة بمناسبة العيديبقي من #حقنا_نعرف لما الرئيس راح السعودية وتم الافراج عن المسجونين في السعودية من المصريين ليه مش تم الافراج عن الست اللي " اتجلًدت " واللي نشروا عنها في الاخبار انها اتحبست بسبب مشكلة مع الاميرة تقريباً ، طيب بلاش دي فين احمد الجيزاوي وليه مش تم الافراج عنه او ليه مفيش اخبار عنه كل ده ولازم نعرف راسنا من رجلنا ، طيب ليه مش تم الافراج عن المعتقلين ومحاكمين عسكرياً ..؟ طيب وبما ان الصفحات كلها بتنشر عن ان رئيس الوزراء دكتور هشام قنديل نزل يجيب لبس العيد والكحك وكده يعني ، وكمان عن الافراج عن المسجونين " جنائياً " محدش ذكر يعني قصة العيش اللي بقي 10 قروش ، محدش جاب سيرته يعني ..؟ ، طيب  وامتي هايتم الافراج عن الابطال المعتقلين في سجون العسكًر  ، بنتمي اننا نلاقي اجابات علي كل ده ..!! 

على الحجار - ضحكة المساجين الكليب { 1 }

تغازل العصافير.. قُضبانها

زنزانة لاجلَك كارهة سجّانها

دُوق زيّنا حلاوة الزنازين

على بُرشَها.. بتمِدّ أطرافك

سجّانك المحتار فى أوصافك

مهما اجتهدْ ماحيعرف انت مين

طوبَى لكل المسجونين باطل

فى زمن.. بيخدعنا وبيماطل

يا شموس بتبرُق فى غُرَف عِتْمين

أما اللى خان وطنَك وأوطانى

م الهيبة.. حاطّينه ف قفص تانى

يصحى وينعس والجميع واقفين

ومصر عارفه وشايفه وبتصبُر

لكنّها ف خَطْفِةْ زمن.. تُعْبُر

وتستردّ الإسم والعناوين

يا دى الميزان اللى طِلعْت لفوق

بينزِّلوك بالعافية أو بالذوق

دول مش بتوع الصدق فى الموازين

الثورة نور.. واللى طفاها خبيث

يرقص ما بين شُهدا وبين محابيس

والدم لسّه مغرَّق الميادين

الحزن طايح فى قلوبنا.. بجدّ

ما فضلْش غير الشوك فى شجر الورد

غِلِط الربيع ودخل فى أغبى كمين

وفى انتظار تيأس مع الأيام

غيرك فى قفصُه بيضربوله سلام

وانت الجزم قبل الكفوف جاهزين

ومصر عارفه وشايفه وبتصبُر

لكنّها ف خَطْفِةْ زمن.. تُعْبُر

وتستردّ الإسم والعناوين

يا عم اقعد بسّ واشرب شاى

الدنيا ماشيه وشعبنا نسّاى

والبركة فى الشاشة وفى الجرانين

واذا هوْهوُوا.. قوم إعلن الأحكام

وكل بُق.. تلجّمه.. بلجام

ومش حتغلب تطبخ القوانين

ويا مصر.. هَدِّى وانتى بتفُوتى

الصوت فى صمتُه.. أعلى من صوتى

آدى السجين اللى ما باتش حزين

واللى يُقف فى وش ثوّارها

ما حيورث إلاّ ذلها وعارها

واللى حيفضل.. ضحكة المساجين

ومصر عارفه وشايفه وبتصبُر

لكنّها ف خَطْفِةْ زمن.. تُعْبُر
وتستردّ الإسم والعناوين